އަހަރެމެން ވަރަށް ފަހުރުވެފައި ބުނާނެ އެވެ. މިއީ ދުނިޔެ މަތީގެ ސުވަރުގެ އެވެ. މި ފަދަ ރީތި މަންޒިލެއް އެހެން ތަނަކުން ހޯދުމަކީ ނުވާނެ ކަމެކެވެ. އެ ހުދު ދޮންވެއްޔާއި ރީތި މޫދުން ހިތަށް ލިބޭ ހިތްހަމަޖެހުން ބޮޑެވެ. އެކަމަކު، އަހަރެމެން މި ތިބީ އެ ހުރިހާ ކަމެއް ގުރުބާންކޮށްގެންނެވެ.

ފަޅުތަކާއި ރަށްތައް ހިއްކައިގެން ގުދުރަތީ ވެށި މަރާލައިފި އެވެ. ވަގުތީ ހިތްހަމަޖެހުމަށް ކުރި އެ މަސައްކަތުން ތިމާވެއްޓަށް ލިބުނީ ދާއިމީ ގެއްލުމެކެވެ. ފަޅުތަކާއި ދިރުންތައް މަރުވުމާއި މުރަކަތައް ހަލާކުވެއްޖެ އެވެ.

ވަރަށް ފަސޭހައިން ކުރެވޭ އެހެން ކަމެކެވެ. ތިޔަ ބޯން ގެންގުޅުނު ފެންފުޅި ހުސްވުމުން ޑަސްބިނެއް ފެންނަން ދެން މަޑުކޮށްލާށެވެ. އެކަމަކު، އެންމެ ފުރަތަމަ ވެސް ލޮލުގައި އަޅައިގަތީ މޫދެވެ. އަތުގައި ހުރި ބާރުމިނެއް ލާފައި އެ ފެންފުޅި ދެން އެއްލައިލީ އެވެ. އަހަރެމެން ބަނޑުފުރާނެ މުއްތި ހޯދާ ކަނޑުގެ ވެށި ވެސް ހަލާކުކޮށްލީ އެވެ.

އޮސްޓްރޭލިއާގެ ފްލިންޑާސް ޔުނިވާސިޓީން މީގެ ހަ އަހަރުކުރިން އާއްމުކުރި ދިރާސާއަކުން ދައްކާގޮތުގައި ރާއްޖޭގައި މަސްމެހާމެހި، ޕްލާސްޓިކް ކެއުމުގެ މައްސަލަ އޮތީ "އިކޮލޮޖިކަލް ކްރައިސިސް" އެއްގަ އެވެ. ރާއްޖޭގެ ކަނޑުފަޅުތަކުން ބާނާ ބައެއް ބާވަތްތަކުގެ މަހުގެ ގޮހޮރާއި ބަނޑުތެރޭގައި، 80 ޕަސެންޓާ ގާތްކުރާ އަދަދަކަށް މައިކްރޯޕްލާސްޓިކްގެ އަސަރު ހުރިކަން ދެނެގަނެވިފައިވާ ކަމަށް ބުންޏެވެ.

ފްލިންޑާސް ޔުނިވާސިޓީގެ ކަނޑުގެ ދިރުންތަކާ ބެހޭ ތަޖުރިބާކާރުން ބުނާގޮތުގައި އެ މުރަކަ ރަށްތަކުގެ ވަށައިގެންވާ ކަނޑުގެ ސަރަހައްދުތަކަކީ މުޅި ދުނިޔޭގެ ނިސްބަތުން ވެސް މައިކްރޯޕްލާސްޓިކް ނުވަތަ ކުދި ޕްލާސްޓިކް އެތިކޮޅުތައް އެންމެ ގިނައިން ހުރި އެއް ހިސާބެވެ.

މިއީ، ރާއްޖެ ކަހަލަ ނާޒުކު ތިމާވެއްޓެއް އޮތް އަދި ޓޫރިޒަމަށް އެކަނި ބަރޯސާވާ ގައުމެއްގައި ކޮންމެހެން ވެސް ވިސްނާލަންޖެހޭ ކަމެކެވެ.

ނަމަވެސް، އަހަރެމެންގެ އަމިއްލަ އަމަލުތަކުން ވެއްޓަށް ބޮޑެތި ގެއްލުންތައް ލިބެ އެވެ. ބައެއް ފަހަރު ސިޔާސަތުގައި ހުރި ބަލިކަށިކަމުންނެވެ. އަނެއްބައި ފަހަރު ދިވެހިންގެ ކަންނެތް ކަމުންނެވެ.