ރާއްޖެއަކީ ބިމުގެ ދަތިކަން އިންތިހާއަށް ބޮޑު ގައުމަކަށް ވުމުން، ގެދޮރުވެރިކަމާއި އިގްތިސާދީ ބޭނުންތަކަށް ބިން ހިއްކުމަކީ ކޮންމެހެން ކުރަންޖެހޭ ކަމެއްގެ ގޮތުގައި ވަނީ ބެލެވިފައެވެ. ދާދިފަހުން އާންމުވި ދިރާސާތަކުން ދައްކާގޮތުގައި، ވޭތުވެދިޔަ 24 އަހަރުތެރޭގައި ރާއްޖެއިން ވަނީ ޔޫރަޕާއި އެފްރިކާ އެއްކޮށްލުމުން ހިއްކުނު ބިމަށްވުރެ ގިނައިން ބިން ހިއްކާފައެވެ. ނަމަވެސް، މި ތަރައްގީއާއެކު އުފެދޭ އެންމެ ބޮޑު ސުވާލަކީ "ބިން ހިއްކުމުން ތިމާވެށްޓަށް ގެއްލުންވޭހެއްޔެވެ؟ "

ތިމާވެށީގެ ރިޕޯޓްތަކަށް ބަލާއިރު، ބިން ހިއްކުމުގެ ސަބަބުން ދިވެހިރާއްޖޭގެ ނާޒުކު ތިމާވެށްޓަށް ފޫނުބެއްދޭވަރުގެ ބޮޑެތި ގެއްލުންތަކެއް ދަނީ ކުރިމަތިވަމުންނެވެ.

ފަރުތަކާއި މުރަކަ ހަލާކުވުން

ކަނޑުގެ އަޑިން ވެލި ނެގުން އަދި ފަޅުފަޅަށް ވެލިއެޅުމުގެ ތެރޭގައި ކަނޑުގެ ލޮނުގަނޑު ކިލަނބުވެ، ކަނޑުއަޑީގައި ޗަކަ ފުނިފުނި އުފެދެއެވެ. މިގޮތަށް އުފެދޭ ތަންތަން ކައިރީގައި ހުންނަ ފަރުތަކުގެ މުރަކަތަކުގެ މައްޗަށް ފެތުރި، މުރަކަ މަރުވެއެވެ.

• ގުޅީފަޅާއި އައްޑޫ ސިޓީގެ ބިން ހިއްކުމުގެ މަޝްރޫއުތަކާ ގުޅިގެން ނޫސްތަކުން ރިޕޯޓްކޮށްފައިވާ ގޮތުގައި، އެތައް ހެކްޓަރެއްގެ މުރަކައާއި މޫދުވިނަ ވަނީ މި ސަބަބާ ހުރެ ސުންނާފަތިވެފައެވެ.

ކުޅިތަކާއި ޗަސްބިންތައް ނެތިދިއުން

ރަށްރަށުގެ ބިން ހިއްކާއިރު، ގިނަ ފަހަރަށް ރަށުގައި ހުންނަ  ކުޅި ފަދަ ސަރަހައްދުތައް ބައްދާލެވެއެވެ. މިސާލު: ގދ. ހޯނޑެއްދޫ އަދި ކުޅުދުއްފުށި

• ކުޅިތަކަކީ ވާރޭވެހިގެން ފުރޭ ފެންގަނޑު ހިފަހައްޓައިދޭ، ރަށުގެ "ސްޕޮންޖް" އޭ ބުނެވިދާނެއެވެ.

• މީގެ އިތުރުން މިއީ ގުދުރަތީ ގޮތުން ރަށަށް ލިބޭ ރައްކާތެރިކަމެކެވެ. ކުޅިތައް ނެތިދިއުމުން ރަށްރަށުގައި ފެންބޮޑުވުމުގެ މައްސަލަ އިންތިހާއަށް އިތުރުވެއެވެ

ގުދުރަތީ އައްސޭރިފަށް ހަލާކުވުމާއި ރަށް ގިރުން

ހިއުމަން ރައިޓްސް ވޮޗް ފަދަ ޖަމާއަތްތަކުގެ ރިޕޯޓްތަކުގައި ފާހަގަކޮށްފައިވާ ގޮތުން، ރަށެއްގެ ވަށައިގެންވާ އޮއިވަރާއި ރާޅު ދަތުރުކުރާ ގޮތް ބެލުމެއް ނެތި ބިން ހިއްކުމުން، ރަށުގެ ގުދުރަތީ ދިފާއީ ނިޒާމު ގެއްލިގެންދެއެވެ.

"ބިން ހިއްކާ ގިނަ ރަށްރަށުގައި ކުރިއަށްވުރެ ބޮޑަށް ރަށް ގިރުމުގެ މައްސަލަ ކުރިމަތިވެ، ރަށުގެ ފެން ފަށަލަ ތަޣައްޔަރުވެ، ލޮނުވުމަށް މެދުވެރިވެއެވެ." އެ ރިޕޯޓުގައިވެއެވެ.

މަސްވެރިކަމާއި ފަތުރުވެރިކަމަށް ހީނަރުކަން އައުން

ރާއްޖޭގެ އިގްތިސާދު ބިނާވެފައިވަނީ ކަނޑުގެ ދިރުންތަކުގެ މައްޗަށެވެ. ބިން ހިއްކުމުގެ ސަބަބުން މަސްތަކުގެ މާހައުލުތައް ހަލާކުވެ، އެ ސަރަހައްދުތަކުން މަސްމަހާމެހި މަދުވެއެވެ. ހަމައެއާއެކު، ފަތުރުވެރިން ޝައުގުވެރިވާ ފަދަ ރީތި ފީނާ ސަރަހައްދުތައް އިކޯސިސްޓަމް ދައުރުކުރަންޖެހޭ ހަމައިން ނެއްޓި، ފަރުތަކުގެ ކުލަ ފަނޑުވެގެންދެއެވެ.

 ޚުލާޞާ

ބިން ހިއްކުމަކީ ރާއްޖޭގެ އާބާދީ އިތުރުވަމުންދާތީ ބޭނުންތެރި ކަމެއް ކަމަށް ވިޔަސް، ސައިންޓިފިކް އަދި ތިމާވެށީގެ ހަރުދަނާ ދިރާސާތަކެއް ނުހަދާ، އަދި ރައްކާތެރިކަމުގެ ފިޔަވަޅުތައބޭނުންނުކޮށް މިކަން ކުރުމަކީ މޫސުމީ ބަދަލުތަކުގެ ކުރިމަތީގައި ރާއްޖޭގެ ނާޒުކުކަން އިތުރަށް ބޮޑުވެ، މުސްތަގުބަލުގައި ދިރިނޫޅެވޭ ފަދަ ތަނަކަށް ރަށްތައް ވުމަށް މަގުފަހިވެދާނެކަމެއްކަމަށް ތިމާވެށީގެ މާހިރުން ބުނެއެވެ.ވ ތަރައްގީ ހޯދަންވާނީ ގުދުރަތީ ރީތިކަމާއި ދިފާއު ގުރުބާން ނުކޮށެވެ.